communio extra missam

RITUS INITIALES

℣. Dóminus vobiscum.

℟. Et cum spíritu tuo.

ACTUS PÆNITENTIALIS

℣. Fratres, agnoscamus peccata nostra, ut apti simus ad hanc sacram celebrationem participandam.

Et fit brevis pausa silentii. Postea simul faciunt confessionem:

Confíteor Deo omnipoténti et vobis, fratres, quia peccávi nimis cogitatióne, verbo, ópere et omissióne: mea culpa, mea culpa, mea máxima culpa. Ideo precor beátam Maríam semper Vírginem, omnes Ángelos et Sanctos, et vos, fratres, oráre pro me ad Dóminum Deum nostrum.

Minister concludit:

Misereátur nostri omnípotens Deus, et dimíssis peccátis nostris, perdúcat nos ad vitam æternam.

Omnes respondent: Amen.

LECTIO BREVIOR VERBI DEI

Legatur a ministro brevis textus Sacræ Scripturæ, in quo sermo sit de pane vitæ.

Léctio sancti Evangélii secúndum Ioánnem. Ego sum panis vivus, qui de cælo descendi.Si quis manducáverit ex hoc pane, vivet in æternum; panis autem quem ego dabo, caro mea est pro mundi vita. Verbum Dómini.

SACRA COMMUNIO

Minister accipit vasculum vel pyxidem cum Corpore Dómini, illud super altare deponit et genuflectit. Deinde orátionem dóminicam his vel similibus verbis introducit:

Præceptis salutáribus móniti, et divina institutione formati, audemus dícere.

et omnes simul pergunt:

Pater noster...

His peractis, minister genuflectit, accipit hostiam, eamque parum elevatam super vasculum vel pyxidem tenens, ad communicandos versus, dicit:

℣. Ecce Agnus Dei, ecce qui tollit peccata mundi. Beati qui ad cenam Agni vocati sunt.

Et communicandi semel subdunt:

℟. Dómine, non sum dignus ut intres sub tectum meum: sed tantum dic verbo, et sanábitur ánima mea.

Postea accipit vasculum vel pyxidem, accedit ad communicandos, et hostiam parum elevatam unicuique eorum ostendit, dicens:

℣. Corpus Christi.

℟. Amen.

Distributione communionis expleta, fragmenta quæ super patena forte inveniantur, minister in pyxidem immittit, itemque pro opportunitate manus abluit. Sacramentum autem, si particulæ superfuerint, in tabernaculo recondit, et genuflectit.

Tunc pro opportunitate sacrum silentium per aliquod temporis spatium servari vel psalmus aut canticum laudis proferri potest.

O sacrum convívium, in quo Christus súmitur, recólitur memória passionis eius, mens impletur grátia, et futuræ glóriæ nobis pignus datur (T.P. Alleluia). Panem de cælo præstitísti eis (T.P. Alleluia). Omne delectamentum in se habentem (T.P. Alleluia.)

Deinde minister dicit orátionem conclusivam:

Oremus.

Deus qui nobis sub sacramento mirábili passionis tuæ memóriam reliquisti, tríbue, quǽsumus, ita nos Córporis et Sánguinis tui sacra mystéria venerari, ut redemptionis tuæ fructum in nobis iúgiter sentiamus. Qui vivis et regnas in sǽcula sæculórum.

℟. Amen.

Tempore Paschale dicitur:

Oremus.

Spíritum nobis, Dómine, tuæ caritatis infunde. ut quos Sacramentis paschálibus satiasti, tua facias pietate concordes. Per Christum Dóminum nostrum.

℟. Amen.

RITUS CONCLUSIONIS

Deinde minister, si est sacerdos vel diaconus, versus ad populum, extendens manus dicit:

℣. Dóminus vobiscum.

℟. Et cum spíritu tuo.

Et benedicit populum, dicens:

℣. Benedícat vos omnípotens Deus Pater, et Fílius, + et Spíritus Sanctus.

℟. Amen.

℣. Ite in pace.

℟. Deo grátias.