veni creator spiritus

Veni, Creator Spíritus Mentes tuórum vísita: Imple supérna grátia Quæ tu creásti péctora.

Qui diceris Paráclitus, Altíssimi donum Dei, Fons vivus, ignis, cáritas, Et spiritális únctio.

Tu septifórmis múnere, Dígitus Patérnæ déxteræ. Tu rite promíssum Patris, Sermóne ditans gúttura.

Accénde lumen sénsibus, Infúnde amórem córdibus. Infírma nostri córporis Virtúte firmans pérpeti.

Hostem repéllas lóngius, Pacémque dones prótinus, Ductóre sic te prǽvio Vitémus omne nóxium.

Per te sciámus da Patrem, Noscámus atque Fílium, Teque utriúsque Spíritum Credámus omni témpore.

Deo Patris sit glória, Et Fílio, qui a mórtuis Surréxit, ac Paráclito In sæculórum sǽcula. Amen.

℣. Emítte Spíritum tuum et creabúntur.

℟. Et renovábis fáciem terræ.

Orémus. Deus, qui corda fidélium Sancti Spíritus illustratióne docuisti; da nobis in eódem Spíritu recta sápere; et de eius semper consolatióne gaudére. Per Christum Dóminum nostrum. R. Amen.